ထိုင်းနိုင်ငံရှိ (Silkworm Books) စာအုပ်တိုက်က ထုတ်ဝေပြီး၊ ဘင်နဒစ် ရော်ဂျာစ် (Benedict Rogers) ရေးသားထားတဲ့ "ဗိုလ်ချုပ်သန်းရွှေအကြောင်း၊ မြန်မာနိုင်ငံ၏ မင်းဆိုးမင်းညစ်တဦးကို မျက်နှာဖုံးခွာကြည့်ခြင်း" ဆိုတဲ့ စာအုပ်အကြောင်းကို တင်ဆက်နေပါတယ်။ ဒီတပတ်မှာတော့ ဗိုလ်ချုပ်သန်းရွှေစာအုပ် နောက်ဆုံးပိုင်း ဘယ်သူတွေက သူ့ရန်သူတွေလဲ၊ သူ့ အရိုက်အရာကို ဘယ်သူတွေ ဆက်ခံကြ မှာလဲ၊ ဗိုလ်ချုပ်သန်းရွှေကို ပေါင်းပြီးစီးပွားဖြစ်နေကြသူတွေက ဘယ်သူတွေလဲ ဆိုတာတွေ ကို ဆက်လက်တင်ပြပါမယ်။
သောတရှင် မိတ်ဆွေများခင်ဗျား။
ဗိုလ်ချုပ်သန်းရွှေနဲ့ ပတ်သက်လို့ အမြင်အမျိုးမျိုး ရှိကြပါတယ်။ ထိုင်းနိုင်ငံက အထက်လွှတ်တော်အမတ် ခရိုင်ဆက် ချူဟာ ၀န်ကတော့ "သူက အရူးပဲ။ ဒါပေမယ့်လည်း ဘာကြောင့်မိုလို့ ဒီလောက်အထိ အာဏာကြီးနေရတာလဲ" လို့ မေးခွန်းထုတ် ခဲ့ဖူးပါတယ်။ ဒါပေမယ့် သူနဲ့တွေ့ဖူးတော့ အနောက်တိုင်းသံတမာန်တဦးကတော့ ဒီမှတ်ချက်ကို သိပ်သဘောမတူပါဘူး။ "သူက အရူးတော့ မဟုတ်ဘူး။ သူက သူရသမျှသတင်းအချက်အလက်တွေအပေါ်မှာတော့ ကျိုးကြောင်းဆီလျော် စဉ်းစားတဲ့လူ၊ သူ့ကြီးပြင်း လာတဲ့ ယဉ်ကျေးမှုဘောင်ထဲက စဉ်းစားတဲ့သူ" လို့တော့ မှတ်ချက်ပေးခဲ့ပါတယ်။
ဒါပေမယ့် သေချာတာက ဗိုလ်ချုပ်မှူးကြီးသန်းရွှေမှာ အာဏာသိပ်ထက်လွန်းနေတာ ပါပဲ။ ဒါနဲ့ပတ်သက်ပြီး သူက ဘယ်လို ပုံ၊ ဘယ်လိုနည်းနဲ့ အာဏာကို ထိန်းချုပ်ထားနိုင်တယ်ဆိုတာ လူအများက စိတ်ဝင်စားကြ ပါတယ်။ အနောက်တိုင်းသံတဦး သုံးသပ်တာကတော့ "သူက စစ်တပ်ရဲ့ အလွှာအားလုံးကို ထိန်းချုပ်ထားတယ်။ အထူးသဖြင့် ရာထူးခန့်ထားတဲ့ကိစ္စကို ကိုင် ပြီး ထိန်းချုပ်ထားတယ်။ ဒါကတော့ ပုံစံအတိုင်းပါပဲ။ ခင်ဗျားကြိုက်တဲ့ ဗိုလ်ချုပ်အုပ်စုတွေကို ခန့်ထားနိုင်မယ်။ စစ်တပ်ကြီး တခုလုံးက စည်းလုံးနေနေ၊ ပြိုကွဲနေနေ အဲဒီဗိုလ်ချုပ်တွေ ကတော့ တစည်းတလုံးတည်း ရှိနေမှာ သေချာတယ်" လို့ ဆိုခဲ့ ပါတယ်။ ဗိုလ်ချုပ်သန်းရွှေ သူတာဝန်ရှိစဉ် ကာလမှာ စစ်တပ်ရာထူး အပြောင်းအလဲတွေ၊ အုပ်စုလိုက် ထုတ်ပစ်ပြောင်းလဲ တာမျိုးတွေ အကြိမ်အတော် များများ လုပ်ခဲ့ပါတယ်။ ရွေးကောက်ပွဲ နီးလာတဲ့အချိန် မကြာသေးမီ လပိုင်းကမှ လုပ်ခဲ့တဲ့စစ် တပ် ရာထူး အပြောင်းအလဲတွေ အပါအ၀င် ဖြစ်ပါတယ်။ ၂၀၀၁၊ ၂၀၀၃ မှာလည်း စစ်တပ်အတွင်းမှာ အစုအပုံအလိုက် ရာထူး အပြောင်းအလဲတွေ လုပ်ခဲ့ပါသေးတယ်။ ၂၀၀၁ ခုနှစ်မှာ အရင် အာဏာရှင်ဟောင်း ဦးနေ၀င်းရဲ့ မြေးတွေက အာဏာသိမ်းဖို့ ကြံစည်တယ်ဆိုပြီး၊ ဦးနေ၀င်းရဲ့သမီး စန္ဒာဝင်းကို အိမ်အကျယ်ချုပ်ချ၊ သူ့ခင်ပွန်း၊ သားတွေကို ထောင်ချခဲ့ ပါတယ်။ အရင် သူတို့စစ်တပ်ရဲ့ လက်ဦးဆရာလို့ ဆိုနိုင်တဲ့ ဦးနေ၀င်းတောင် အိမ် အကျယ်ချုပ်ချထားတဲ့ အထဲမှာ အကျုံး ၀င်ခဲ့ပါသေးတယ်။ တကယ်တော့ ဒီဆုံးဖြတ်ချက်ဟာ ခပ်ပေါ့သေးသေး ဆုံးဖြတ်ချက်မျိုးတော့ မဟုတ်ပါဘူး။ သူ့ရဲ့ အာဏာရည်ရွယ်ချက် ဘယ်လောက်ရှိနေတယ်ဆိုတာကို ဖော်ပြခဲ့ တာလည်း ဖြစ်ပါတယ်။ အဲဒါအပြင် ဦးနေ၀င်းအုပ်စုနဲ့ နီးစပ်တယ်ယူဆတဲ့ စစ်တပ် တပ်မှူးတွေကိုလည်း ထုတ် ပယ်ပစ်ခဲ့ပါတယ်။ ဒီလိုနဲ့ ၂၀၀၂ ခုနှစ် ဒီဇင်ဘာလမှာ ဦးနေ၀င်း ကွယ်လွန်ခဲ့ပါတယ်။ စစ်တပ်ရဲ့ဖခင် အဲဒီ အာဏာရှင်ဟောင်းကြီးရဲ့ ဈာပနကိုတောင် သပိတ်မှောက်ပြီး မပို့ဆောင်ဘဲ ထားဖို့၊ ညွှန်ကြားခဲ့ပါသေးတယ်။
စစ်တပ်ထောက်လှမ်းရေးမှူးချုပ် ဗိုလ်ချုပ်ခင်ညွန့်ဟာလည်း အပြင်မှာသာ ခြင်္သေ့ဖြစ်နေမယ်။ ဗိုလ်ချုပ်သန်းရွှေ ရှေ့ကို ရောက်တဲ့အခါ လုံးဝပြားဝပ် ကျိုးနွံနေတာ တွေ့ဖူးတယ်လို့ အရင်က ကုလသမဂ္ဂ မြန်မာပြည်အထူး သံ အဖြစ် ဆောင်ရွက်ခဲ့ တဲ့ ရာဇာလီ အစ္စမိုင်လ်က ဖော်ပြခဲ့ပါတယ်။ နောက်ပိုင်းမှာတော့ အဲဒီအချိန်က ၀န်ကြီးချုပ် တာဝန်ယူထားသူ ဗိုလ်ချုပ်ကြီး ခင်ညွန့် အပါအ၀င် ထောက်လှမ်းရေးတဖွဲ့လုံးကို ဖျက်သိမ်းခဲ့ပါတယ်။ ဒါသာမက ထောက်လှမ်းရေးတပ်ထဲက တာဝန်ရှိသူ တပ်မှူး အတော်များများကိုပါ နှစ်ရှည်ထောင်ဒဏ်တွေ ချမှတ်ခဲ့ပါသေး တယ်။ မြန်မာနိုင်ငံမှာ စစ်တပ်က အစိုးရတာဝန် နေရာ အတော်များများမှာ ထိုးဖောက်ယူထားပါတယ်။ "စစ်တပ်က နိုင်ငံတော်အတွင်းမှာ နောက်ထပ်နိုင်ငံတော် အသေး တခု" ထပ်ဖြစ်နေရတယ်လို့ မြန်မာ့နိုင်ငံနဲ့ ပတ်သက်လို့ စာအုပ်အတော်များများ ရေးခဲ့တဲ့ ဘာတေးလ် လင့်တနာက သုံးသပ်ခဲ့ပါတယ်။ အဲဒီစစ်တပ် ကို လည်း သူက သစ္စာခံမယ့် ဗိုလ်ချုပ်တွေနဲ့ ချုပ်ကိုင်လို့ ဗိုလ်ချုပ်သန်းရွှေက ထိန်းချုပ်ထား လိုက်ပြန်ပါတယ်။
ဗိုလ်ချုပ်သန်းရွှေကို အနီးကပ် ဆက်ဆံနိုင်တဲ့သူလည်း အနည်းငယ်ပဲ ရှိပါတယ်။ အခုအခါမှာဆိုရင် နေ့တဓူဝ တာဝန်တွေ ကို ဗိုလ်ချုပ်သန်းရွှေက ဆုံးဖြတ်နေတာ မဟုတ်တော့ဘူး။ ရုံးကိုပေါ်မလာတဲ့ ရက်တွေ အတော် များများတောင် ရှိတယ်လို့ ဆိုပါတယ်။ ဒါပေမယ့် သေချာတာက အရေးပါတဲ့ ဆုံးဖြတ်ချက်တွေဆိုရင်တော့ ဗိုလ်ချုပ်သန်းရွှေဆီကမှ ဆင်းသက်လာရ တာပါ။ ဗိုလ်မှူးကြီးစိုးရှင်၊ စစ်ဖက်လက်ထောက် ဗိုလ်ချုပ်နေ၀င်း၊ ဗိုလ်ချုပ်ကျော်ဝင်း၊ သူ့သစ္စာတော်ခံ ဗိုလ်ချုပ်မြင့်ဆွေ၊ ဦးအောင်သောင်း စသဖြင့် အနည်းအကျဉ်းနဲ့သာ အတွေ့ခံ တိုင်ပင်လေ့ရှိတယ်လို့ ဆိုပါတယ်။ ဗိုလ်ချုပ်သန်းရွှေ ဆုံးဖြတ် ချက်ချပုံနဲ့ ပတ်သက်လို့လည်း လူပြောများလှပါတယ်။ စစ်တပ်အတွင်းက အတူတွဲ လုပ်ကိုင်ဖူးသူတွေအဖို့ ပြောကြတာက ဗိုလ်ချုပ်သန်းရွှေက ဒီလောက်ကြီး ဆိုးသွမ်းကြမ်းကြုတ်နေသူတော့ မဟုတ်ဘူး။ ပြောရမယ်ဆိုရင် အရောင်အသွေး မရှိတဲ့ သူ၊ လူထဲ ထင်ထင်ပေါ်ပေါ် ခေါင်းဆောင်မဟုတ်တဲ့သူပါ။ သူ့ရဲ့ ခေါင်းဆောင်မှုမှာ ထူးခြားချက် ၂-ခု ရှိတယ်လို့ စာရေးသူ ဘင် ရော်ဂျာက သုံးသပ်ဖော်ပြခဲ့ပါတယ်။ ပထမ အချက်ကတော့ သူက ဆုံးဖြတ်ချက်တခုကို အလျင်အမြန်ချဖို့ ဆိုတာ သိပ်ခက်ပါတယ်။ သူက အခြေအနေကို ဒီအတိုင်း လွှတ်ထား၊ တချိန်ချိန် ရင့်မှည့်လာမှ သင့်တော်သလို ကြည့်ဆုံးဖြတ် တာပါ။ သူက ကိုယ့်ကိုကိုယ် ယုံကြည်မှု မရှိဘူး၊ ဆုံးဖြတ် ချက်တွေက အမြဲနောက်ကျနေတတ် တယ်လို့ ဝေဖန်သူတွေ တောင် ရှိခဲ့ပါတယ်။ ဒုတိယထူးခြားချက်ကတော့ သူက တခုခုကို တုံ့ပြန်တဲ့အနေနဲ့သာ ဆုံးဖြတ်ချက်ချတတ်တယ်လို့ ဝေဖန် သုံးသပ်မှုတွေလည်း ရှိခဲ့ပါတယ်။ ဒီလိုမျိုး သစ္စာခံ စစ်ဗိုလ်ချုပ်တစု ချယ်လှယ်နေတဲ့ အခြေအနေကိုလည်း မကျေနပ်သူ အတော်များများ ရှိပါတယ်။ ဒါပေမယ့် သူတို့က စိန်ခေါ် ရဲကြတာ၊ ပြန်လှန် မေးခွန်းထုတ်ရဲကြတာတော့ မဟုတ်ပါဘူး။ အပြင် တရားမ၀င် စကားဝိုင်းတွေမှာသာ မကျေနပ်ကြောင်း ပြောကြတာပါ။ ဘာဖြစ်လို့ ကျန်တဲ့သူတို့ တတွေက ဗိုလ်ချုပ် သန်းရွှေနဲ့ လူနည်းစု ဗိုလ်ချုပ်တအုပ်ကို ပြန်မလှန်ရဲကြတာလဲလို့ စာရေးသူက မေးခွန်းထုတ်ခဲ့ပါ သေးတယ်။ မြန်မာတွေရဲ့ အထက်လူကြီး စကားဆိုရင် မပယ်ရှားတတ်တဲ့ အလေ့အထကြောင့်လား၊ အခြား အကြောင်း အချက်တွေ ကြောင့်လား၊ ဘာသာရေးကြောင့်လား ဆိုတာလည်း ဆွေးနွေးထားခဲ့ပါသေးတယ်။
သူလွန်ပြီးတဲ့ ကာလမှာ နောက်ထပ် ဆက်ခံဖို့ ထားခဲ့မယ့်သူတွေက ဘယ်သူတွေ ဖြစ်မလဲဆိုတာကို စာရေးသူက စော ကျောသုံးသပ်ခဲ့ပါသေးတယ်။ စာရေးသူ ဘင်ရော်ဂျာကတော့ ဗိုလ်ချုပ်မောင်အေးကို သိပ်မထင်လှပါဘူး။ သူက နံပါတ်-၂ နေရာမှာ ရှိနေသူပါ။ နံပါတ်-၂ ကနေ ၁ ဖြစ်ချင်ကောင်း ဖြစ်ချင်မယ်။ ဒါပေမယ့် တွန်းတွန်း တိုက်တိုက် လုပ်မယ့်သူမဟုတ် ဘူး။ အရက်ကို အတော်သောက်သုံးနေတဲ့ ဗိုလ်ချုပ်မောင်အေး အနေနဲ့ တခုခုကို ဦးဆောင်ဦးရွက် လှုပ်ရှားလိုသူ မဟုတ် ဘူး။ မကျေနပ်တာတွေ ရှိနေရင်တောင်၊ ဗိုလ်ချုပ်သန်းရွှေအလွန် ကာလမှာ သူ့အလိုလို နံပါတ်-၁ ဖြစ်လာမယ့် အချိန်ကို စောင့်မယ့်သူလို့ သုံးသပ်ဖော်ပြခဲ့ပါတယ်။
ဗိုလ်ချုပ်သန်းရွှေနေရာကို ဆက်ခံဖို့ ရွေးချယ်ထားတဲ့ လူတွေ စာရင်းမှာတော့ စာရေးသူ ဘင်ရော်ဂျာက အခု နံပါတ်-၃ ခေါင်းဆောင် ဗိုလ်ချုပ်ရွှေမန်း၊ အခုတော့ ဦးရွှေမန်း ရှိနေတယ်လို့ သုံးသပ်ထားပါတယ်။ ဗိုလ်ချုပ် မြင့်ဆွေ၊ ဦးအောင် သောင်းတို့ကလည်း နောက်ထပ်သစ္စာခံ လူယုံတွေပါ။ တဖက်မှာလည်း ကြံ့ခိုင်ဖွံ့ဖြိုးရေး အဖွဲ့၊ အခုတော့ ကြံ့ဖွံ့ပါတီကို သူရဲ့ အာဏာ ကျောထောက်နောက်ခံ လူထုအင်အားစုအဖြစ် လုပ်ဆောင်ထား ပါသေးတယ်။ နောက်တပတ်မှာတော့ အဲဒီ ဆက်ခံမယ့် အုပ်စုအကြောင်း၊ ဗိုလ်ချုပ်သန်းရွှေက ရန်သူလို့ မြင်သူတွေ၊ သူနဲ့ပေါင်းပြီး စီးပွားဖြစ်နေသူတွေအကြောင်းကို ဆက်လက်တင်ပြပါမယ်။ အားလုံး ငြိမ်းချမ်းပျော်ရွှင် ကြပါစေ။
(ယခု ဆောင်းပါးကို လွတ်လပ်သောအာရှအသံ မြန်မာပိုင်းအစီအစဉ် RFA မှ ထုတ်လွှင့်သွားခဲ့ပြီး ဖြစ်ပါသည်။ RFA ၏ မူပိုင်သာဖြစ်ပြီး ပြန်လည်ဖော်ပြခြင်း ဖြစ်သည်။)
No comments:
Post a Comment