Pages

Friday, September 17, 2010

ဗိုလ်ချုပ်သန်းရွှေအကြောင်း (အပိုင်း-၉)


ထိုင်းနိုင်ငံရှိ (Silkworm Books) စာအုပ်တိုက်က ထုတ်ဝေပြီး၊ ဘင်နဒစ် ရော်ဂျာစ် (Benedict Rogers) ရေးသားထားတဲ့ "ဗိုလ်ချုပ်သန်းရွှေအကြောင်း၊ မြန်မာနိုင်ငံ၏ မင်းဆိုးမင်းညစ်တဦးကို မျက်နှာဖုံးခွာကြည့်ခြင်း" ဆိုတဲ့ စာအုပ်အကြောင်းကို တင်ဆက်နေပါတယ်။ ဒီတပတ်မှာတော့ လူသားမျိုးနွယ်တရပ်လုံးအပေါ် ကျူးလွန် ချိုးဖောက်တဲ့ ရာဇ၀တ်ပြစ်မှုမျိုးတွေ ဗိုလ်ချုပ်သန်းရွှေ ချိုးဖောက်နေသလားဆိုတဲ့ မေးခွန်းအပေါ် ဆက်လက်တင်ပြပါမယ်။

သောတရှင် မိတ်ဆွေများခင်ဗျား။
ဗိုလ်ချုပ်သန်းရွှေ (နအဖ) စစ်အစိုးရ ဥက္ကဋ္ဌဖြစ်လာတော့ အစောပိုင်းမှာ နိုင်ငံ တကာမိသားစုက သဘောထားပျော့ပြောင်း တဲ့သူ တဦးဖြစ်မလားလို့ မျှော်လင့် ခဲ့ကြပါတယ်။ သူအာဏာရလာပြီးတဲ့အချိန်မှာ နိုင်ငံရေးအကျဉ်းသား ရာဂဏန်းလောက် လွှတ်ပေးတာ လုပ်ခဲ့သလို၊ အပြည်ပြည်ဆိုင်ရာ ကြက်ခြေနီအဖွဲ့ကိုလည်း ထောင်တွေအတွင်း စစ်ဆေးခွင့်ပေးခဲ့ပါတယ်။ ဒေါ်အောင်ဆန်းစုကြည်နဲ့လည်း တွေ့ခွင့်ပေးခဲ့ပါတယ်။ စီးပွားရေးဝန်ကြီး ဗိုလ်မှူးချုပ် ဒေးဗစ်အေဘယ်ကို ဦးဆောင်စေပြီး စီးပွားရေးပွင့်လင်းစေဖို့ တချို့ လုပ်ဆောင်ချက်တွေလည်း လုပ်ခဲ့ပါသေးတယ်။ အခု စာအုပ်မှာ ဖော်ပြထားသလိုပဲ မြန်မာ နိုင်ငံရှိ တိုင်းရင်းသားတွေ ရဲ့ ပြည်တွင်းစစ်အကြောင်း လေ့လာသူ မာတင်စမစ် (Martin Smith) ကလည်း အလားတူဖော်ပြခဲ့တာမျိုး ရှိပါတယ်။ ဗိုလ်ချုပ်သန်းရွှေ နအဖ ဥက္ကဋ္ဌဖြစ်လာပြီး မကြာခင်မှာပဲ တိုင်းရင်းသားစည်းလုံးညီညွတ်ရေးကို အကြောင်းပြလို့ ကရင်သူပုန်တွေအပေါ် ထိုးစစ်ဆင် နေတဲ့ မာနယ်ပလောထိုးစစ်ကိုလည်း ဆိုင်းငံ့ပေးခဲ့ပါသေးတယ်။ ဒါပေမယ့် ဒီလို အခြေအနေက ကြာကြာမခံပါဘူး။ နောက်ပိုင်းမှာ တိုင်းရင်းသားလူမျိုးစုတွေအပေါ် ထိုးစစ်တွေ ပြန်စလာခဲ့သလို၊ ကျန်တဲ့ ဖိနှိပ်မှုတွေလည်း ဆက်လို့ဖြစ်ပေါ်လာခဲ့ပါတယ်။ အခုအချိန်တိုင် နာမည်ဆိုးတဲ့ အကျဉ်းထောင်တွေထဲမှာ နိုင်ငံရေး အကျဉ်းသား ၂, ၀၀၀ ကျော် ရှိနေပါသေးတယ်။

စာရေးသူ ဘင်ရော်ဂျာကတော့ ကရင်ပြည်နယ်အတွင်းက IDP လို့ခေါ်တဲ့ ပြည်တွင်းမှာ ရွှေ့ပြောင်း ထွက်ပြေး နေရသူ ဒုက္ခ သည်တွေရဲ့ အဖြစ်အပျက်တွေကို တင်ပြလို့ အချို့သော စစ်တပ်ရဲ့ ရက်စက်ကြမ်းကြုတ်မှုတွေကို ဖော်ပြခဲ့ပါတယ်။ ရှေ့တန်း မှာ တာဝန်ယူရတဲ့ မြန်မာစစ်တပ်က စစ်သားတွေက အရပ်သားပြည်သူတွေကို မထင်ရင် မထင်သလို သတ်ဖြတ်နေတာ၊ လူမဆန်စွာ ရက်စက်မှုတွေ ကျူးလွန်နေတာ၊ အမျိုးသမီးတွေ အပေါ်မှာလည်း မုဒိန်းမှု အပါအ၀င် လိင်ပိုင်းဆိုင်ရာ စော် ကားကျူးလွန်နေတာ၊ မြန်မာစစ်တပ်က ကလေး စစ်သားတွေ အတင်းအကျပ်နဲ့ အကျယ်အပြန့် စုဆောင်းနေတဲ့ကိစ္စတွေကို သက်သေ သာဓကတချို့နဲ့ ဖော်ပြပါတယ်။ အဓမ္မလုပ်အားခိုင်းစေမှုတွေ ဖြစ်ပေါ်နေတာလည်း တနိုင်ငံလုံး အနှံ့ပါပဲ။ ဒီလို လူ့အခွင့် အရေး ချိုးဖောက်နေတာဟာ နေရာဒေသ တခု၊ ၂ ခုထဲမှာ ကွက်ပြီး ဖြစ်ပေါ်နေတာ မဟုတ်ပါဘူး။ ဒီနေရာမှာ မေးခွန်းတခုက အခုလို လူ့အခွင့်အရေး ကျူးလွန်ချိုးဖောက်နေတာတွေကို ဗိုလ်ချုပ်သန်းရွှေက မသိလို့လား။ သိလျက်နဲ့ ခွင့်ပြုထားတာလားဆိုတဲ့ ကိစ္စပဲ ဖြစ်ပါတယ်။

ဒီကိစ္စနဲ့ ပတ်သက်လို့ စာရေးသူ ဘင်ရော်ဂျာကတော့ ဗိုလ်ချုပ်သန်းရွှေနဲ့ တွေ့ဆုံစကားပြောခွင့်ရတဲ့ သံအမတ်တဦးက ပြောပြတာကို ပြန်လို့ဖော်ပြထားပါတယ်။ ၁၉၉၅ ခုနှစ်မှာ အနောက်တိုင်းသံအမတ်ကြီး တဦးက သူ့ရဲ့ သံအမတ် ခန့်အပ်လွှာကို ပေးရင်း ဗိုလ်ချုပ်သန်းရွှေနဲ့ တွေ့ပါတယ်။ အခြားအကြောင်းကိစ္စတွေ မှာတော့ သူတို့ အေးအေးဆေးဆေးစကား ပြောနိုင်ကြပါတယ်။ ဒါပေမယ့် သံအမတ်က လူ့အခွင့်အရေး ကိစ္စ တွေအကြောင်း စကားစလာတော့ စကားဝိုင်းက တင်းမာ သွားခဲ့ပါတယ်။ ဗိုလ်ချုပ်သန်းရွှေက "ကျနော်တို့က ဗုဒ္ဓဘာသာဝင်တွေပဲ။ ယင်ကောင်တကောင်တောင် မသတ်ဘူး" လို့ လုံးဝ ပြန်ငြင်းခဲ့ပါတယ်။ သံအမတ်ကတော့ ဗိုလ်ချုပ်သန်းရွှေဟာ ပိုးအိမ်ထဲက ပိုးတကောင်လို သူ့ကမ္ဘာထဲမှာ သူနေနေတယ်လို့ ဖော်ပြခဲ့ပါတယ်။ အလား တူပဲ စစ်အစိုးရရဲ့ သတင်းမီဒီယာတွေနဲ့ သံအမတ်တွေက ဒီလိုစွပ်စွဲချက်တွေကို အမြဲတန်း ငြင်းပယ်နေခဲ့ကြ ပါတယ်။ သူတို့အပေါ် နိုင်ငံတကာအမြင်ကို ပြောင်းလဲနိုင်အောင်ဆိုပြီး စစ်အစိုးရက သဘောထား ပြောင်းလဲ တော့ မယောင် သတင်းမှားတွေပေးပြီး အနောက်တိုင်းက ပညာရှင်တွေကို အမြဲတန်းလှည့်ဖျား အသုံးချခဲ့တယ် လို့ တချိန်က ထောက်လှမ်းရေးအရာရှိ ဗိုလ်မှူးအောင်လင်းထွဋ်က ပြန်ပြောပြပါတယ်။

ဒါပေမယ့် ဗိုလ်ချုပ်သန်းရွှေကိုယ်တိုင် လူအစုအပြုံလိုက် သတ်ဖြတ်မှု ကျူးလွန်ခဲ့တယ်ဆိုပြီး၊ ဗိုလ်မှူး အောင် လင်းထွဋ် ကိုယ်တိုင် သူ့အတွေ့အကြုံကို အခြေခံပြီး ပြန်စွပ်စွဲထားတဲ့ ဖြစ်ရပ်တခုတော့ ရှိပါတယ်။ ဒီဖြစ်ရပ်က မြန်မာနိုင်ငံတောင်ပိုင်း ဇာဒက်ကြီး ရေတပ်စခန်းအနီးမှာ ၁၉၉၈ ခုနှစ်မှာ ဖြစ်ခဲ့တာပါ။ အဲဒီအနီးက ကျွန်း တကျွန်းအပေါ်မှာ အပြစ်မဲ့အရပ်သား ပြည်သူ ၈၁ ယောက်ကို စစ်ဆင်ရေးကာလတခုအတွင်းမှာ သတ်ဖြတ် ပစ်ခဲ့တာပါ။ အဲဒီကာလ စစ်ဆင်ရေးကို ဦးဆောင်တဲ့ သူကတော့ အခုအချိန်မှာ ကြံ့ခိုင်ဖွံ့ဖြိုးရေးအသင်း အတွင်းရေးမှူးတာဝန်ယူနေတဲ့၊ လျှပ်စစ်စွမ်းအား ၀န်ကြီးလည်း ဖြစ်တဲ့ ဗိုလ်မှူးကြီးဇော်မင်း ဖြစ်ပါတယ်။ မြိတ်ကျွန်းစုအတွင်းမှာ ရှိတဲ့ ခရစ္စတီးလို့ အမည်ရတဲ့ ကျွန်းအပေါ်မှာ စစ်အစိုးရဥပဒေတွေကို ဆန့်ကျင်ပြီး သစ်ခုတ်၊ ၀ါးခုတ်နေသူတွေကို စစ်တပ်က ဖမ်းဆီးရမိခဲ့ပါတယ်။ အဲဒီအချိန် ၁၉၉၈ ခုနှစ်၊ မေလ မတိုင်မီ ကတည်းက အခု ကာကွယ်ရေးဦးစီးချုပ် ဖြစ်မယ့်သူလို့ နာမည်ပြေးနေတဲ့ ဗိုလ်ချုပ်မြင့်အောင်က ကျွန်းတွေ အပေါ်မှာ ဘယ် သူမှ နေခွင့်မရှိဆိုပြီး အမိန့်ထုတ်ထားခဲ့ပါတယ်။ ရွာသားတွေကို ဖမ်းမိတဲ့စစ်တပ်တွေက ဘယ်လို ဆက်လက်လုပ်ဆောင်ရ မယ်ဆိုတာ အမိန့်တောင်းခဲ့ပါတယ်။ ဗိုလ်မှူးအောင်လင်းထွဋ်က ထောက်လှမ်းရေးတပ်မှူးအဖြစ် တာဝန်ယူနေခဲ့ရသူပါ။ ဒီ အချိန်မှာ ဗိုလ်ချုပ်မှူးကြီးသန်းရွှေ ကိုယ်တိုင်က အားလုံးကို သတ်ပစ်ဖို့ အမိန့်ပေးခဲ့ပြီး၊ အဲဒီအမိန့်အတိုင်း သတ်ဖြတ်ခံခဲ့ကြ ရပါတယ်။ "မိန်းမတွေ၊ ကလေးတွေအဆုံး ဘယ်သူမှ အသက်ရှင်ရက် မမြင်ချင်ဘူး" ဆိုတဲ့ ညွှန်ကြားချက်တွေလည်း ရှိခဲ့ပါတယ်။ တကယ်လို့ ဒီလို လူ့အခွင့်အရေးချိုးဖောက်မှုတွေကို ဗိုလ်ချုပ်သန်းရွှေက အမှန် မသိရှိဘူးဆိုရင် သူကိုယ်တိုင် စုံစမ်းစစ်ဆေးရေး ကော်မရှင်တွေ ဖွဲ့စည်းပြီး ဆောင်ရွက်ဖို့အကြောင်း ရှိပါတယ်။ ဒီလို ကော်မရှင်တွေဖွဲ့စည်း စစ်ဆေးတာ တွေလည်း မရှိခဲ့ဘူးလို့ လေ့လာသူတွေက ပြောကြပါတယ်။

ဒီလို ဆိုးဆိုးရွားရွား လူ့အခွင့်အရေးချိုးဖောက်ခဲ့တာတွေကို မှတ်တမ်းတင်ထားတာတွေ အများအပြားရှိပါတယ်။ မြန်မာ နိုင်ငံ လူ့အခွင့်အရေးကိစ္စ စုံစမ်းတင်ပြသူ လူ့အခွင့်အရေးကော်မရှင် အထူးအရာရှိ သက္ကရာဇ် ၂၀၀၀ ကနေ ၂၀၀၈ ခုနှစ် အထိ တာဝန်ထမ်းခဲ့သူ ပေါ်လိုဆာဂျီယို ပင်ညဲရိုးရဲ့ အစီရင်ခံစာတခုမှာ "ပြီးခဲ့တဲ့ ၁၅-နှစ်ကာလအတွင်းမှာ မြန်မာစစ်တပ် က ကျေးရွာပေါင်း ၃,၃၀၀ ကျော်ကို မီးရှို့ဖျက်ဆီးခဲ့တယ်။ အခုလို ကျူးလွန်တဲ့ စစ်သားတွေကိုလည်း အပြစ်ပေး အရေးယူ တာ မရှိဘဲ လွတ်လွတ်လပ်လပ်ပဲ လွှတ်ထားတယ်" လို့ ဖော်ပြခဲ့ပါသေးတယ်။ အဲဒါအပြင် ဟားဗတ်တက္ကသိုလ် လူ့အခွင့်အရေးကုစားရေးဌာနက လေ့လာတင်ပြခဲ့တဲ့ အစီရင်ခံစာမှာ အရင်နိုင်ငံတကာ ရာဇ၀တ်ခုံရုံးတွေမှာ တာဝန်ယူဖူးသူ တရား သူကြီးတွေ သုံးသပ်ဖော်ပြ ခဲ့တာကတော့ ကုလသမဂ္ဂ လူ့အခွင့်အရေး အစီရင်ခံစာတွေကို ခြုံငုံသုံးသပ်ရင်ပဲ မြန်မာပြည်မှာ အခု ကျူးလွန်ချိုးဖောက်နေတဲ့ အနေအထားက လူသားမျိုးနွယ်တရပ်လုံးအပေါ် ကျူးလွန်ချိုးဖောက်တဲ့ ရာဇ၀တ်မှု အနေအထား Crime against Humanity ကို ဆိုက်ရောက်နေပြီလို့ သုံးသပ်ထားတာ ရှိပါတယ်။

ဗိုလ်ချုပ်သန်းရွှေနဲ့ သူ့ဇနီး ဒေါ်ကြိုင်ကြိုင်က လူမြင်ကွင်းရှေ့မှာ ဗုဒ္ဓဘာသာဝင်ကောင်းတွေလို ဘုရား ကျောင်း ကန်သွား တာ၊ သံဃာတွေကို ဆည်းကပ်တာ၊ အလှူဒါနပြုတာတွေ မကြာခဏဆိုသလို မြင်ကြရပါတယ်။ ဒါပေမယ့် ၂၀၀၇ ခုနှစ်၊ ရွှေဝါရောင်သံဃာ့လှုပ်ရှားမှုတုန်းက အကြမ်းဖက်ချေမှုန်းတာတွေ မြင်ရတော့ အာဏာနဲ့ ပတ်သက်လာရင် သံဃာတွေ အပါအ၀င် ဘယ်သူမှ သည်းညည်းမခံနိုင်ဘူးဆိုတာ သဘောပေါက်ခဲ့ကြ ရပါ တယ်။ နောက်တပတ်မှာတော့ အင်ပိုင်ယာ ပြည်ရှင် တယောက်လို ပြုမူနေတဲ့ ဗိုလ်ချုပ်သန်းရွှေအကြောင်းကို ဆက်လက်တင်ပြပါမယ်။ အားလုံး ငြိမ်းချမ်းပျော်ရွှင် ကြပါစေ။

(ယခု ဆောင်းပါးကို လွတ်လပ်သောအာရှအသံ မြန်မာပိုင်းအစီအစဉ် RFA မှ ထုတ်လွှင့်သွားခဲ့ပြီး ဖြစ်ပါသည်။ RFA ၏ မူပိုင်သာဖြစ်ပြီး ပြန်လည်ဖော်ပြခြင်း ဖြစ်သည်။)


Share/Bookmark

No comments:

Recent Comments