ထိုင်းနိုင်ငံရှိ (Silkworm Books) စာအုပ်တိုက်က ထုတ်ဝေပြီး၊ ဘင်နဒစ် ရော်ဂျာစ် (Benedict Rogers) ရေးသားထားတဲ့ "ဗိုလ်ချုပ်သန်းရွှေအကြောင်း၊ မြန်မာနိုင်ငံ၏ မင်းဆိုးမင်းညစ်တဦးကို မျက်နှာဖုံးခွာကြည့်ခြင်း" ဆိုတဲ့ စာအုပ်အကြောင်းကို တင်ဆက်နေပါတယ်။ ဒီတပတ်မှာတော့ ပြည့်ရှင်မင်းတရားတဦး၊ အင်ပိုင်ယာ ပြည့်ရှင်တဦးလို ပြုမူနေတဲ့ ဗိုလ်ချုပ်မှူးကြီး အကြောင်းကို ဆက်လက်တင်ပြပါမယ်။
သောတရှင် မိတ်ဆွေများခင်ဗျား။
ဗိုလ်ချုပ်သန်းရွှေရဲ့သမီး မသန္ဒာရွှေ မင်္ဂလာဆောင်တော့ ခမ်းနားကြီးကျယ်စွာ ကျင်းပတာကို မြင်ရတော့ လူတိုင်းက အံ့သြ ဒေါသ ဖြစ်ကြရပါတယ်။ သတို့သား ဗိုလ်မှူးဇော်ဖြိုးဝင်းနဲ့ ဗိုလ်ချုပ်ကြီးသမီး သတို့သမီးတို့ရဲ့ မင်္ဂလာပွဲကို အနောက် တိုင်းပုံစံ ၀ှဲချီးကျင်းပခဲ့ပါတယ်။ ၀တ်ကောင်းစားလှ ၀တ်ဆင်ထားကြတဲ့ စစ်အစိုးရနဲ့ နီးစပ်သူ လူကုန်ထံတွေ၊ စီးပွားရေးသမားတွေ ကလည်း မျက်နှာလို မျက်နှာရ လက်ဖွဲ့ပစ္စည်း အမြောက်အများ ပေးခဲ့ကြပါတယ်။ သူတို့က ဗိုလ်ချုပ်မှူးကြီးရဲ့ သမီး သတို့ သမီးမှာ စိန်တွေညွှတ်နေအောင် ဆင်ထားတာကိုလည်း မြင်တွေ့ခဲ့ကြရပါတယ်။ မင်္ဂလာ လက်ဖွဲ့အနေနဲ့ ဇိမ်ခံကားတွေ၊ အိမ်တွေ အပါအ၀င် အမေရိကန်ဒေါ်လာ သန်း ၅၀ ဖိုးလောက် လက်ခံရရှိခဲ့ကြတယ်လို့ ဆိုပါတယ်။ ဒီမင်္ဂလာပွဲကို နိုင်ငံပိုင် ရုပ်မြင်သံကြားတွေက ပြသခဲ့တာတော့ မရှိပါဘူး။ လူထုအများမြင်ခဲ့ကြရတာက တော့ အဲသည် မင်္ဂလာပွဲဗီဒီယိုက ပြင်ပ ကို ပေါက်ကြားလာပြီး၊ ပြင်ပက သတင်းမီဒီယာတွေက ပြန်ပြတော့မှသာ မြင်ကြရ တာပါ။ လူအများကတော့ အဲဒီ မင်္ဂလာပွဲကို "စိန်စီတဲ့ည" လို့ လူသိများပြီး၊ လူအများငတ်မွတ် ခေါင်းပါး ဆင်းရဲနေရစဉ်မှာ အခုလို ပပလွှားလွှားသုံးဖြုန်း မင်္ဂလာဆောင်နိုင်တာ မြင်ကြရလို့ အံ့သြဒေါသထွက်နေကြရတာပါ။ အခုလို ခမ်းနားတဲ့ မင်္ဂလာပွဲ ဖြစ်လာတဲ့ အကြောင်း ကိုလည်း လူတွေက ဆန်းစစ်ကြပါသေးတယ်။ စစ်အစိုးရ ဒုခေါင်းဆောင် ဗိုလ်ချုပ်မောင်အေးရဲ့ သမီး မင်္ဂလာဆောင်တော့ ရန်ကုန်က ဆီဒိုးနားဟိုတယ်မှာ ကြီးကြီးကျယ်ကျယ် လုပ်ခဲ့ဖူးပါတယ်။ အခု ဗိုလ်ချုပ်မှူးကြီးရဲ့ သမီး မင်္ဂလာပွဲဟာ သည့်ထက်ကြီးကျယ်အောင် ဂုဏ်တုဂုဏ်ပြိုင်လုပ်တာလို့လည်း လူတွေက ဆိုကြပါတယ်။
အာဏာရှင်တွေက အဲသလိုပဲ သူတို့ကိုယ်သူတို့ ပိုပြီး ကြီးကျယ်ခမ်းနားအောင် လုပ်လေ့ရှိတယ်လို့လည်း ဗိုလ်ချုပ် သန်းရွှေ အကြောင်း စာအုပ်ရေးတဲ့ ဘင်ရော်ဂျာက ဖော်ပြခဲ့ပါသေးတယ်။ ဇင်ဘာဘွေနိုင်ငံက အာဏာရှင်ကြီး မူဂါဘီအကြောင်း ကို ရေးသားခဲ့တဲ့ စာရေးဆရာ ဟေဒီ ဟော်လန်ရဲ့စာအုပ်မှာလည်း သူ့ရဲ့အသက် ၈၃-နှစ် မြောက် မွေးနေ့ကို တကယ့်ကို ကြီးကြီးကျယ်ကျယ် ကျင်းပခဲ့ပုံကို နှိုင်းယှဉ်ဖော်ပြပါတယ်။ လူတွေက စားရ သောက်ရမဲ့ ဖြစ်နေချိန်မှာ ဒေါ်လာတသန်း လောက် အကုန်အကျခံပြီး အခုလိုကျင်းပနိုင်တာကို မခံမရပ်နိုင် ဒေါသထွက်ကြရတာပါ။ ဗိုလ်ချုပ်သန်းရွှေရဲ့ သမီး မင်္ဂလာ ပွဲ ကုန်ကျငွေက မူဂါဘီရဲ့မွေးနေ့ပွဲထက် အဆ-၅၀ လောက် ပိုကုန်ကျခဲ့တယ်လို့လည်း ဘင်ရော်ဂျာက နှိုင်းယှဉ်ဖော်ပြခဲ့ပါ သေးတယ်။
ဗိုလ်ချုပ်သန်းရွှေမှာ သားသမီး ၈ ယောက်ရှိတယ်လို့ ဖော်ပြပါတယ်။ ကိုနိုင်စံရွှေ၊ ကိုထွန်းနိုင်ရွှေ၊ မဒေ၀ါရွှေ၊ မခင်ပြုံးရွှေ၊ မကြည်ကြည်ရွှေ၊ ကိုသန့်ဇော်ရွှေ၊ မအေးအေးသစ်ရွှေ၊ မသန္တာရွှေတို့ ဖြစ်ပါတယ်။ ဒီစာအုပ် ထဲမှာတော့ ဒေါ်ကြိုင်ကြိုင် ဖက် အရင်အိမ်ထောင်က ပါလာတဲ့ အခုအခါ ဘိုးတော်လို့နာမည်ကျော်နေသူ ကိုမောင်မောင်ဆိုသူ တယောက်ကိုထည့် ဖော်ပြတာတော့ မတွေ့ရပါဘူး။ အဲဒီသားသမီးတွေက ဗိုလ်ချုပ် သန်းရွှေ ရာထူးငယ်စဉ်ဘ၀မှာ စစ်ကားနဲ့ ကျောင်းတက်ရ တယ်၊ မာန်မာနထောင်လွှားခြင်း မရှိဘဲ နေခဲ့ကြတယ်ဆိုတာကို စာရေးသူက အရင်အသိမိတ်ဆွေတွေကို မေးမြန်းပြီး ဖော် ပြခဲ့ပါတယ်။ ဒါပေမယ့် အခုလို နိုင်ငံ့အကြီးအကဲတာဝန်ယူရပြီးတဲ့ နောက်ပိုင်းမှာတော့ သည်လိုမဟုတ်တော့ပါဘူး။ သူတို့ က ပပလွှားလွှားနိုင်ကြတယ်လို့ သတင်းကျော်စောသလို၊ အများကို ဗိုလ်ကျတယ်၊ တနိုင်ငံလုံးက ပစ္စည်းကိုလည်း ကိုယ် ပိုင်သဖွယ် ထင်တိုင်းကျဲပြုမူနေတယ်ဆိုတာမျိုး သတင်းတွေ အများအပြား ရှိခဲ့ပါတယ်။ ခုနက စိန်တွေသီးနေတဲ့ မင်္ဂလာ ဆောင်တခုတည်းတင် မဟုတ်ပါဘူး။
ဗိုလ်ချုပ်သန်းရွှေရဲ့ မိသားစုက ထီးနန်းပြည့်ရှင်တွေလို ပြုမူတယ်။ သြဇာအာဏာ ပြလွန်းတယ်ဆိုတာကို လူအများက ပြောကြပါတယ်။ စာရေးဆရာ ဘင်ရော်ဂျာကတော့ အချို့သတင်းတွေကို ကိုးကားပြီး ဖော်ပြခဲ့ ပါတယ်။ ၂၀၀၂ ခုနှစ်မှာ ဗိုလ်ချုပ် သန်းရွှေနဲ့ မိသားစု မော်လမြိုင်ကို လာလည်တော့ ဆိုင်တဆိုင်က မီးထွန်းထားတဲ့ ဂျင်နရေတာစက်ကို သဘောကျပါ တယ်။ သူပြန်တဲ့အခါကျတော့ ထရပ်ကားတစင်းကို လွှတ်ပြီး အဲဒီမီးစက်ကို ယူစေဖို့ စစ်တိုင်းမှူးကို အမိန့်ပေးခဲ့တယ်လို့လဲ သိရပါတယ်။ တခြားခရီးစဉ်တခုမှာလည်း သူတို့မိသားစု မေမြို့ (အခု ပြင်ဦးလွင်) ကို သွားလည်ရင်း ကုန်တိုက်တခုကို ရောက်တော့ ကြိုက်ရာပစ္စည်းတွေ လက်ညှိုးထိုးယူခဲ့ကြပါတယ်။ ငွေတကျပ်မပြားမှ မပေးခဲ့ပါဘူး။ သူတို့ပြန်တော့ မေမြို့ မှာရှိတဲ့ စစ်တက္ကသိုလ်က အဲဒီပစ္စည်းတွေတန်ဖိုး ပြန်ပေးဖို့ လူထုတွေကို အတင်းအကျပ် အလှူထည့်ခိုင်းခဲ့တယ်လို့လည်း ဆိုပါတယ်။ အဲသည်လို ကိစ္စတွေအပြင် သူတို့ လိုတာရအောင် ဆောင်ကျဉ်းပေးရသူတွေ ရဲဘော်နောက်လိုက်တွေ အတွက်လည်း မလွယ်လှပါဘူး။ တခါက နယ်ခရီးစဉ်တခုမှာ ဗိုလ်ချုပ်သန်းရွှေနဲ့ ဒေါ်ကြိုင်ကြိုင်က မုန့်လင်မယားစားချင် တယ်ဆိုလို့ လိုက်ဝယ်ပေးရသူတွေ အတော်အခက်ကြုံခဲ့ပါသေးတယ်။ နောက်တခါမှာလည်း ဒေါ်ကြိုင်ကြိုင်က ဆပ်ပြာ ဆိုရင် "ဆန်းလိုက်"ဆပ်ပြာမှ လိုချင်တယ်။ သူတို့အ၀တ်တွေကို စက်နဲ့ မလျှော်ဘဲ ဆန်းလိုက်ဆပ်ပြာနဲ့ လက်နဲ့လျှော်ခိုင်း လို့ အောက်ခြေတပ်မှူးကတော်တွေ ဒုက္ခကြုံကြရပါသေးတယ်။ နောက်တယောက် ပြည်သူအများသိကြတာကတော့ ဗိုလ်ချုပ်ကြီးရဲ့ အချစ်ဆုံးမြေး ဖိုးလပြည့်ပဲ ဖြစ်ပါတယ်။ နာမည်အရင်းက နေရွှေသွေးအောင်လို့ ခေါ်ပါတယ်။ သူ့ရဲ့မိဘတွေ အိမ်ထောင်ရေး အဆင်မပြေကြလို့ ဗိုလ်ချုပ်သန်းရွှေနဲ့ ဒေါ်ကြိုင်ကြိုင်က ကရုဏာပိုပြီး မွေးစားထားတဲ့ မြေးငယ်ပါ။ သူက ဘောလုံး ၀ါသနာအိုးဖြစ်သလို အလိုလိုက်တော့ ကဲချင်တိုင်းကဲနေတဲ့ ကလေးလည်း ဖြစ်ပါတယ်။ ၂၀၀၇ ခုနှစ်၊ ဧပြီလ မေမြို့ကို သွားကြတဲ့ ခရီးစဉ်တခုမှာ သူ့မြေး နေရွှေသွေးအောင်အတွက် တပ်မတော်ရဟတ်ယာဉ်ကို ရန်ကုန်လွှတ်ပြီး ဘဲကင် အ၀ယ်ခိုင်းခဲ့တယ်လို့လည်း ဆိုပါတယ်။ အဲဒီနှစ်မှာပဲ နေရွှေသွေးအောင်ရဲ့ ၁၆-နှစ်မြောက် မွေးနေ့ကို ဆီဒိုးနား ဟိုတယ်မှာ တကယ့်ကို အကြီးအကျယ် ကျင်းပခဲ့ပါသေးတယ်။ ဒီလို ပလွှားသုံးဖြုန်းရင်း သူကလည်း အဆိုတော်၊ ရုပ်ရှင် မင်းသားတွေလို နာမည်ကျော်တယောက် ဖြစ်နေရသူပါ။ ပြည်သူတွေကတော့ စိန်မျောက်မျောက်လို့ နာမည်ပေးထားတဲ့ အကြောင်းကိုလည်း ဘင်ရော်ဂျာက ထည့်ဖော်ပြခဲ့ပါသေးတယ်။
တချိန်က ရိုးရိုးကုတ်ကုတ်နေခဲ့တဲ့ သူ့ရဲ့သားသမီးတွေ လောဘကလည်း အတောမသတ် ဖြစ်လာကြပုံကို စာရေးသူက ဖော်ပြပါတယ်။ ၂၀၀၈ ခုနှစ်က သတင်းတခုအရ မန္တလေး ၂၂-လမ်းက သမာဓိရွှေဆိုင်မှာ ဗိုလ်ချုပ်သန်းရွှေ သမီးတွေက သန်းကျပ် ၁၀၀ ဖိုးလောက် ရွှေတွေ တချိန်တည်း ၀ယ်ယူခဲ့ကြတယ်လို့ ဆိုပါတယ်။ အဲဒီအချိန်မှာ တိုင်းပြည်ထဲက လူတဦး အတွက် ကျန်းမာရေးစရိတ်ကို ဒေါ်လာဆင့် ၄၀ လောက်ပဲ သုံးစွဲနေတဲ့အချိန်ပါ။ နောက်တခါ တရုတ်နိုင်ငံက တရုတ်- အာဆီယံစီးပွားရေး ဇုံဥယျာဉ်ထဲမှာ မြန်မာနိုင်ငံ အတွက်ရတဲ့ မြေကွက်ကို ဒုတိယသမီး မခင်ပြုံးရွှေက အမေရိကန်ဒေါ်လာ သန်း ၂၀၀ နဲ့ တရုတ်ကုမ္ပဏီ၂-ခုကို ပြန်ရောင်းချပေးခဲ့တယ်။ ဒီကိစ္စမှာ မြန်မာနိုင်ငံက ကုန်သည်ကြီးများအသင်းကလည်း ကူညီပေးခဲ့ရတယ်ဆိုတဲ့ အတည်မပြုနိုင်တဲ့ သတင်းတွေလည်း ထွက်ပေါ်ခဲ့ပါတယ်။ သူ့သားသမီးတွေအပါအ၀င် နီးစပ်တဲ့ ၀န်ကြီးတွေ၊ ဗိုလ်ချုပ်ကြီးတွေရဲ့ ခြစားမှု၊ အကျင့်ပျက် လာဘ်စားမှုတွေကို ဗိုလ်ချုပ်သန်းရွှေက မျက်ကွယ်ပြုထားခဲ့ပါ တယ်။ တိုင်းပြည်ကို သူ့အမွေပိုင်လို့ ထင်မြင်နေပုံပါပဲ။ ဒါတင်မက မြို့တော်ကို ပျဉ်းမနားကို ရွှေ့ နေပြည်တော်လို့ အမည် ပြောင်းခဲ့ချိန်ကစလို့ ဆောက်လုပ်ရေးလုပ်ငန်းတွေအတွက်လည်း တိုင်းပြည်ဘဏ္ဍာကို စိတ်ထင်တိုင်း သုံးစွဲနေခဲ့ပါတယ်။ နန်းမြို့သစ်တည် မင်းတရားကြီးလို့ ထင်မှတ်နေပုံရပါတယ်။ နောက်တပတ်မှာတော့ ဗိုလ်ချုပ်သန်းရွှေက တိုင်းပြည်မှာ စိတ် တိုင်းကျ ချယ်လှယ်နေတဲ့ တည်ဆောက်ရေးစီမံကိန်းကြီးတွေ၊ အဲဒီ အကျိုးဆက်ကြောင့် ပြည်သူတွေ ဆင်းရဲဒုက္ခဖြစ်နေရပုံ ကို ဆက်လက်တင်ဆက်ပါမယ်။ အားလုံး ငြိမ်းချမ်း ပျော်ရွှင်ကြပါစေ။
(ယခု ဆောင်းပါးကို လွတ်လပ်သောအာရှအသံ မြန်မာပိုင်းအစီအစဉ် RFA မှ ထုတ်လွှင့်သွားခဲ့ပြီး ဖြစ်ပါသည်။ RFA ၏ မူပိုင်သာဖြစ်ပြီး ပြန်လည်ဖော်ပြခြင်း ဖြစ်သည်။)
No comments:
Post a Comment