မိန့်ခွန်းတွေက
ခေါင်းကိုက်ဖျားနာစေကြတယ်
စကားတွေဟာ
ကူးစက်ရောဂါ ပိုးတွေပါပဲကွယ်။
နံရံတွေမှာ
နားတွေ မရှိဘူး
ထွေးခံတွေပဲရှိတယ်။
ထွေးခံတွေက အသံချဲ့စက်တွေ ဖြစ်လာ
တံထွေးတွေသာ လွင့်စင်လာကြပေါ့။
မင်းနဲ့ ကိုယ်ကြားမှာ
ပရိတ်ချည်နဲ့ ချုပ်ထားမရတဲ့
ပါးစပ်များစွာ ရှိကြတယ်၊
သူတို့ဟာ နံနက်တိုင်း သွားတိုက်ကြတယ်
စကားလုံးများကတော့ ညစ်ထေး
ခွေးအူသံလောက်ပါပဲ။
လုံခြုံမှု မရှိတဲ့
အိမ်သာတံခါးများရဲ့
ပုတ်အဲ့နံစော် စကားများ
ဝါးစားမိပြီလား ချစ်သူ
ကိုယ့်ကို အပြစ်ယူခဲ့တယ်
ဆင်ခြေဆင်လက်များဟာ
ပဉ္စလက် အတတ်တွေပဲမို့
မယုံလို့လည်း နေနိုင်တယ်
ယုံလို့လည်း သေနိုင်တယ်။
< ၀မ်းနည်းစရာပေါ့ >
ယုတ္တိနည်းကျ
ဘာသာဗေဒ ပညာကုန်
ရင်ခုန်သံ ဆက်သွယ်နည်းနဲ့
တို့နှစ်ဦးရဲ့ ခရီးကြား
စကားများ ရှားပါးလှပေါ့။
ယောဟန်အောင်
ဇွန် ၂၁၊ ၁၉၈၇။
No comments:
Post a Comment