ဗိုလ်ချုပ်သန်းရွှေအကြောင်း(အပိုင်း-၇)

ထိုင်းနိုင်ငံရှိ (Silkworm Books) စာအုပ်တိုက်က ထုတ်ဝေပြီး၊ ဘင်နဒစ် ရော်ဂျာစ် (Benedict Rogers) ရေးသားထားတဲ့ "ဗိုလ်ချုပ်သန်းရွှေအကြောင်း၊ မြန်မာ နိုင်ငံ၏ မင်းဆိုးမင်းညစ်တဦးကို မျက်နှာဖုံးခွာကြည့်ခြင်း" ဆိုတဲ့ စာအုပ်အကြောင်းကို တင်ဆက်နေပါတယ်။ ဒီတပတ်မှာတော့ ဗိုလ်ချုပ်သန်းရွှေ စစ်တပ်ထဲမှာ အဆင့်ဆင့်ရာထူးတက်လာပုံနဲ့ တပြိုင်နက် တည်းမှာ ဖြစ်နေတဲ့ နောက်ကြောင်းဖြစ်ရပ်တွေကို ဆက်လက် တင်ပြပါမယ်။

သောတရှင် မိတ်ဆွေများခင်ဗျား။
အခုတလောမှာ မြန်မာ့တပ်မတော်အတွင်းက ထိပ်ပိုင်းတပ်မှူးနေရာ အတော်များများ အစုလိုက်အပြုံလိုက် အပြောင်းအလဲ ဖြစ်တာကို သတင်းမီဒီယာတွေက ကြားရပါတယ်။ (နအဖ) အဖွဲ့ဥက္ကဌ ဗိုလ်ချုပ်မှူးကြီး သန်းရွှေနဲ့ ဒုတိယဥက္ကဌ ဒု-ဗိုလ်ချုပ်မှူးကြီးမောင်အေးတို့တောင် အနားယူမယ်ဆိုပြီး သတင်းတွေတောင် ထွက်ပေါ် လာခဲ့ ပါတယ်။ အခု ကျနော်က သူ့အကြောင်းစာအုပ်တင်ပြနေတုန်း အနားယူလိုက်မယ်ဆိုရင် အာဏာရှင်ကြီး ဗိုလ်ချုပ်သန်းရွှေအကြောင်း ပြောရတာ တောင် နည်းနည်းပေါ့သွားနိုင်ပါတယ်။ လူတွေစိတ်ဝင်စားမှုလည်း ကျ ဆင်းသွားနိုင်ပါသေးတယ်။ ဒါပေမယ့် နောက်ပိုင်း သတင်းတွေအရ ဘာပဲဖြစ်ဖြစ် အခုစစ်ရာထူးအပြောင်းအရွှေ့ ကိစ္စတွေကို စီမံနေတာက သူပဲ။ ဗိုလ်ချုပ်သန်းရွှေကပဲ အာဏာမစွန့်တန်း ဆက်ယူထားဦးမယ်ဆိုတဲ့ သတင်း တွေ ကြားတော့ ဒီစာအုပ်အကြောင်း ဆက်ပြောရမှာတော့ အားပြန်ရှိလာပါတယ်။

အရင်အပတ်က တင်ပြခဲ့ရာမှာ ဗိုလ်ချုပ်သန်းရွှေက အရက်သေစာမသောက်၊ ဆေးလိပ်မသောက်၊ မာန ထောင်လွှားမှု မရှိဘူး၊ လူပေါင်းဆန့်တယ်ဆိုတဲ့အကြောင်းတွေ တင်ပြခဲ့ပါတယ်။ ဒီလိုအခြေအနေကနေ အခု အာဏာရှင်ကြီးလို ပြောင်းလဲသွားတာဟာ အာဏာကြောင့်၊ အºကွင်းမဲ့အာဏာဟာ လူကိုပိုလို့ ဖျက်ဆီးတတ်တဲ့ အကြောင်း သူ့အပေါ် သုံးသပ်ချက်တွေလည်း တင်ပြခဲ့ပါသေးတယ်။ ဒါပေမယ့် ဒီကိစ္စတွေဟာ စစ်တပ်အတွင်း သူတာဝန်ယူစဉ်ကာလ သူ့ဘေးမှာကြုံနေရတဲ့ နိုင်ငံရေး အခြေအနေ၊ အခြားခေါင်းဆောင်တွေရဲ့ အတက်အကျ အပေါ်မှာလည်း သင်ခန်းစာယူပြီး ကိုယ့်ဘာသာ ဆက်လက် ရှင်သန်နိုင်ရေးအတွက် ရုန်းကန်ကြိုးပမ်းမှုတွေက နေ ဖြစ်ပေါ်လာပုံရပါတယ်။ တခါက တပ်မတော်နေ့ စစ်ရေးပြကွင်းမှာ နှုတ်ဆက်နေတုန်း သူလက်မြှောက်နေတဲ့ ပုံကို ဓာတ်ပုံဆရာတဦးက ဓာတ်ပုံရိုက်ယူ ထားတာ ကြည့်ရတော့ သူ့လက္ခဏာအရေးအကြောင်းတွေက တခြားသူတွေနဲ့ မတူတဲ့အကြောင်း တွေ့ရပါတယ်။ သာမာန်လူအများစုမှာ လက္ခဏာ အရေးအကြောင်း ၃-ခု ရှိပေမယ့်၊ ဗိုလ်ချုပ်သန်းရွှေက ၂-ကြောင်းထဲရှိပြီး၊ မြန်မာတွေက "လက်ပြတ်ကြီး" လို့ ခေါ်ကြတဲ့လက်မျိုး ဖြစ်ပါတယ်။ ဒီလို လက်ပိုင်ရှင်ဆိုရင် သနားကြင်နာမှုနည်းတယ်၊ ရက်စက်တတ်တယ်လို့ အယူအဆရှိပါတယ်။ ဒီလို အနေအထားကြောင့်လည်း အခုနေရာကို ရောက်လာတာ ဖြစ်နိုင်သလို၊ စာရေးသူ ဘင် ရော်ဂျာ သုံးသပ်တာ ကတော့ ဗိုလ်ချုပ်သန်းရွှေရဲ့ ထူးခြားတဲ့အရည်အချင်းကတော့ အခြားသူတွေအမြင်မှာ ရန်နည်း အောင်၊ အဆိပ် မရှိသလို နေတတ်တဲ့အရည်အချင်းပဲလို့ ဆိုပါတယ်။

ဘယ်လိုပဲဖြစ်ဖြစ် သူဖြတ်သန်းခဲ့ရတဲ့ စစ်တပ်ထဲက နောက်ခံဖြစ်ရပ်တွေနဲ့ ပြန်သုံးသပ်ကြည့်ရအောင်ပါ။ ဗိုလ်ချုပ်သန်းရွှေက စစ်ရေးမှာ ထူးချွန်ပြောင်မြောက်တာမျိုး မကြားခဲ့ရပါဘူး။ ဒါပေမယ့် သူနဲ့အလုပ် လုပ်ကိုင် ဖူးသူတွေ၊ ခေတ်ပြိုင်အရာရှိတွေ ပြောပြချက်အရ သူက အမြဲတမ်း (Yes-man) သူ့အရာရှိ အကြိုက်ဆောင် တတ်တဲ့သူလို့ ဆိုပါတယ်။ အဲဒါအပြင် စစ်ရုံးချုပ်မှာ တာဝန်ယူနေစဉ်ကာလ ထိတွေ့ဖူးခဲ့တဲ့ ထိပ်ပိုင်းခေါင်း ဆောင်တွေက သဘောကျကြတာကြောင့်လည်း သူ့တက်လမ်းရလာတာ ဖြစ်နိုင်ပါတယ်။ သူနဲ့ အတူလုပ်ကိုင် ဖူးတဲ့ တပ်မ-၈၈ ဒုတပ်မမှူး ဗိုလ်မှူးချုပ်အေးကို ရာထူးတက်လာတာနဲ့အမျှ သူလည်း ရာထူးတက်လာခဲ့ပါတယ်။ စစ်ရုံးချုပ်မှာ -စစ်ဦးစီးမှူး (တတိယတန်း) တာဝန်ကနေ၊ နောက်ပိုင်း တပ်မ-၈၈ မှူးအထိ ရာထူးတက်လာခဲ့ တာပါ။ အဲဒီ ၁၉၇ဝ ခုနှစ်များ ကာလတွေမှာ နိုင်ငံရေးမတည်ငြိမ်မှုကလည်း အများအပြား ဖြစ်ပါတယ်။ ပြည်သူ ပိုင်သိမ်းရာကနေ စီးပွားရေးတွေ ကမောက်ကမဖြစ်၊ ပြည်သူတွေ ကျပ်တည်းဆင်းရဲလာရကနေ ၁၉၇၄ ခုနှစ်မှာ ကျောင်းသား၊ အလုပ်သမားဆန္ဒပြပွဲတွေ၊ မှိုင်းရာပြည့် အရေးအခင်း၊ ဦးသန့်ဈာပန ဆန္ဒပြပွဲတွေ ဖြစ်လာခဲ့ရ ပါတယ်။ သွေးထွက်သံယို ဖြိုခွဲချေမှုန်းမှုတွေလည်း ရှိခဲ့ရပါတယ်။

စစ်ရုံးချုပ်မှာ ဗိုလ်သန်းရွှေ တာဝန်ယူနေစဉ်ကာလက၊ သူ့အပေါ်က ဦးစီးချုပ်က အခု အမျိုးသားဒီမိုကရေစီ အဖွဲ့ချုပ် (NLD) ခေါင်းဆောင် ဗိုလ်ချုပ်ကြီးတင်ဦး ဖြစ်ပါတယ်။ ဗိုလ်ချုပ်ကြီးတင်ဦးကို ရဲဘော်စစ်သားတွေက လေးစားချစ်ခင် ကြသလို၊ ပြည်သူလူထုတွေကလည်း အားကိုးကြပါတယ်။ သူက ပြုပြင်ပြောင်းလဲရေး လုပ်လိုသူ လို့လည်း နာမည်ကျော်ပါတယ်။ ကျောင်းသားဆန္ဒပြပွဲတွေမှာတောင် ဆန္ဒပြသူတွေက နေဝင်း-စန်းယုအလိုမရှိ အော်ကြပေမယ့်၊ ဗိုလ်ချုပ်ကြီးတင်ဦးကို အားပေးခဲ့ကြပါတယ်။ စစ်တပ်ထိပ်သီး ခေါင်းမာဂိုဏ်းသားတွေကြားမှာ ဗိုလ်ချုပ်ကြီးတင်ဦးရဲ့ အဆိုပြုချက်တွေ အများအပြား ပယ်ချခံရတယ်ဆိုတာ ပြည်သူတွေကြားရပါတယ်။ ဒါပေ မယ့် ဦးနေဝင်းက အဲသလို သူရဲကောင်းမျိုး မလိုချင်ပါဘူး၊ သူ့အာဏာကို ခြိမ်းခြောက်တယ်လို့ မြင်ပါတယ်။ ဒါကြောင့်ပဲ သိပ်မကြာခင်မှာ ဗိုလ်ချုပ်ကြီးတင်ဦးကို လာဘ်စားတယ် စွပ်စွဲပြီး ဖယ်ရှားခဲ့ပါတယ်။ နောက်ထပ် သြဇာထက်လာသူကတော့ ထောက်လှမ်းရေးတပ်မှူး နာမည်တူ ဗိုလ်မှူးကြီးတင်ဦး ဖြစ်ပါတယ်။ သူက အမ်အိုင်တင်ဦးလို့ နာမည်ကျော်ပါတယ်။ သူလည်း နောက်တော့ ၁၉၇၇ ခုနှစ်မှာ ဖယ်ရှားခံရပါတယ်။ ၁၉၇၆ မှာတော့ စစ်တပ်ထဲက ဗိုလ်ကြီးအုန်းကျော်မြင့် ခေါင်းဆောင်တဲ့ အရာရှိငယ်တွေက စစ်အာဏာသိမ်းဖို့ ကြံစည်မှု တခုဖြစ်ပွားခဲ့ပါတယ်။ သူတို့လုပ်ကြံမယ့်သတင်း ပေါက်ကြားတာကြောင့် ဘာမှမလုပ်ခင်မှာဘဲ ဖမ်းဆီးခံရပါတယ်။ စစ်တပ် အရာရှိ အများအပြားလည်း ရာထူးက ဖယ်ရှားခံကြရပါတယ်။ သူတို့က အဲဒီ အချိန်က ဗိုလ်သန်းရွှေကို တိုင်ပင် ဖို့ မစဉ်းစားခဲ့ကြပါဘူး။ ဘာဖြစ်လို့လည်းဆိုတော့ ဗိုလ်သန်းရွှေက ခပ် ထုံထုံလူ၊ တခုခုပြောဆို တိုင်ပင်ရင်လည်း အထက်အရာရှိကို ပထမဦးဆုံးပြေးပြီး သတင်းပေးမယ် ယူဆထား တာကြောင့်ပါ။ တခါ ဗိုလ်သန်းရွှေ စစ်ရုံးချုပ် မှာ တာဝန်နေရတုန်း အရှေ့ပိုင်းတိုင်းစစ်ဌာနချုပ် တခုလုံးရဲ့ တပ်မှူး ဗိုလ်မှူးချုပ် ထွန်းရီကို ရာထူးချအပြစ်ပေး တာလည်း ကြုံခဲ့ရပါသေးတယ်။ ဗိုလ်ချုပ်ထွန်းရီက နပိုလီယံ လို့နာမယ်ပေးထားသလို စစ်ရေးထက်မြက်သူပါ၊ ဒါပေမယ့် သူက ဒေသဆိုင်ရာပါတီဆွေးနွေးပွဲမှတ်တမ်းတခုကို တည်းဖြတ်တင်ပြဖို့ ပျက်ကွက်ခဲ့တယ်ဆိုပါတယ်။ အဲဒီ ဒေသဆိုင်ရာပါတီအစည်းအဝေး မှတ်တမ်းမှာ ဦးနေဝင်း က အားပေးအားမြှောက် လုပ်နေတဲ့ ဆိုရှယ်လစ် စနစ်ကို ဝေဖန်ထားတာကြောင့် ရာထူးချအပြစ်ပေးခံရတာပါ။ ဒီလိုနဲ့ သူက ကွန်မြူနစ်တပ်တွေနဲ့ တိုက်ခိုက်နေ ရာကနေ နောက်တန်းကို ပြန်ရောက်လာပြီး၊ ဗိုလ်သန်းရွှေ အောက်မှာတောင် ပြန်ပြီး တာဝန်ထမ်းခဲ့ရပါတယ်။

တခါ ၁၉၇၇ ခုနှစ်၊ စတုတ္ထအကြိမ် (မဆလ) ပါတီညီလာခံမှာ ပါတီခေါင်းဆောင်တချို့က နိုင်ငံရေး၊ စီးပွားရေး အခြေအနေတွေ နဲ့ ပတ်သက်ပြီး မကျေမနပ်ဖြစ်တာကြောင့် ဦးနေဝင်းကို မဲနဲ့ဖယ်ရှားဖို့ ကြိုးပမ်းချက်လည်း လုပ်ခဲ့ပါသေးတယ်။ ဦးနေဝင်းက အရေးပေါ်ပါတီညီလာခံ ပြန်ခေါ်ပြီးတော့ သူ့မဲကိုအနိုင်ရအောင် ပြန်လုပ်ခဲ့ ပါတယ်။ သူ့ကိုအာခံဖို့ ကြိုးစားသူတွေကိုလည်း ဖြုတ်ချဖယ်ရှားခဲ့ပါတယ်။ ဗိုလ်ချုပ်သန်းရွှေ တပ်မမှူးဖြစ်တော့ အဲဒီအချိန်က လိုအပ်ချက်အရ ၁၉၈၁ ခုနှစ်မှာ သူက မြန်မာ့ဆိုရှယ်လစ် လမ်းစဉ်ပါတီ ဗဟိုကော်မီတီဝင် ဖြစ်လာခဲ့ပါတယ်။ ဒီလို အရှုပ်အထွေး အကျပ်အတည်းတွေကြားက ဗိုလ်ချုပ်သန်းရွှေ တက်လမ်းရှာလာခဲ့ရတာပါ။

သူက ဦးနေဝင်းရဲ့ သစ္စာရှိသူတွေကိုသာ နေရာပေးတဲ့ လုပ်ပုံကိုင်ပုံတွေ၊ အတိုက်အခံ ပြိုင်ဘက်ဆိုရင် အကြင်နာ ကင်းကင်းနဲ့ ချေမှုန်းဖြိုခွင်းပုံတွေ၊ အာဏာရဲ့ သဘောတွေကို သင်ခန်းစာယူပြီး၊ ကိုယ့်ရှင်သန်ရေးနဲ့ တိုးတက်ရေးကို ကြိုးပမ်းအားထုတ်ခဲ့တာကို တွေ့နိုင်ပါတယ်။

နောက်တပတ်မှာတော့ ၁၉၈၈ ခုနှစ်ကာလနောက်ပိုင်း ဗိုလ်ချုပ်သန်းရွှေအကြောင်းကို ဆက်လက်တင်ပြပါမယ်။ အားလုံး ငြိမ်းချမ်းပျော်ရွှင်ကြပါစေ။


(ယခု ဆောင်းပါးကို လွတ်လပ်သောအာရှအသံ မြန်မာပိုင်းအစီအစဉ် RFA မှ ထုတ်လွှင့်သွားခဲ့ပြီး ဖြစ်ပါသည်။ RFA ၏ မူပိုင်သာဖြစ်ပြီး ပြန်လည်ဖော်ပြခြင်း ဖြစ်သည်။)